Në vazhdën e porosisë së kryeministrit Edi Rama, të dhënë gjatë mbledhjes së Këshillit Kombëtar për të Drejtat dhe Mbrojtjen e Fëmijëve, Ministria e Shëndetësisë dhe Mirëqenies Sociale ka përgatitur një paketë ndërhyrjesh. Këto masa kanë si qëllim përmirësimin e kuadrit ligjor, forcimin e kapaciteteve institucionale dhe rritjen e bashkëpunimit mes strukturave që ofrojnë shërbime për fëmijët.

Gjatë mbledhjes së Këshillit Kombëtar, e zhvilluar në Ditën Ndërkombëtare të të Drejtave të Fëmijëve, u miratua një Deklaratë e Përbashkët, në të cilën institucionet angazhohen për mbrojtjen e dinjitetit, pjesëmarrjen dhe garantimin e mundësive të barabarta për çdo fëmijë në Shqipëri. Kjo është një hap i rëndësishëm drejt garantimit të të drejtave të fëmijëve dhe krijimit të një ambienti më të sigurt për ta.

Ministrja e Shëndetësisë dhe Mirëqenies Sociale, Klodiana Spahiu, gjatë prezantimit të nismave kryesore, theksoi rëndësinë e respektimit të të drejtës së fëmijëve për t’u shprehur dhe për të marrë pjesë në jetën publike. Ajo gjithashtu nënvizoi përgjegjësinë e institucioneve për të mbrojtur fëmijët nga çdo formë dhune, manipulimi dhe shfrytëzimi. “Duhet të jemi të qartë se e drejta e fëmijëve për t’u shprehur, për t’u dëgjuar dhe për të marrë pjesë në jetën publike duhet të respektohet. Njëkohësisht, kemi përgjegjësinë për t’i mbrojtur ata nga çdo formë dhune, manipulimi, shfrytëzimi apo përfshirjeje në veprime që cenojnë sigurinë dhe zhvillimin e tyre”, u shpreh ministrja Spahiu.

Në të njëjtën linjë, kryeministri Edi Rama theksoi se Këshilli duhet të funksionojë si një strukturë aktive me një plan konkret dhe kalendar të përcaktuar, për të avancuar masat në mbrojtje të të drejtave të fëmijëve. Në përfundim të takimit, anëtarët e Këshillit Kombëtar për të Drejtat dhe Mbrojtjen e Fëmijëve nënshkruan Deklaratën e Përbashkët, duke formalizuar angazhimin institucional për zbatimin e nismave dhe masave të parashikuara. Rekomandimet e konsoliduara përfshijnë zbatimin e kuadrit ligjor, rritjen e kapaciteteve institucionale, sigurimin e financimit të qëndrueshëm dhe përmirësimin e koordinimit të shërbimeve. Një pjesë e masave lidhen me Agjendën Kombëtare për të Drejtat e Fëmijëve 2027–2030 dhe Planin e Garancisë Evropiane për Fëmijët 2026–2030, ndërsa të tjerat parashikojnë ndërhyrje të reja për përmirësimin e sistemit të mbrojtjes së fëmijëve.